Jurnalistik faoliyatga alohida e’tibor qaratish barobarida sohadagi og‘riqli muammolarga yechim topish bo‘yicha sezilarli o‘zgarishlar amalga oshirilmoqda. Jurnalistika sohaga qiziquvchilar hamda oliy ta’limni mazkur yo‘nalishda davom ettirish istagidagilarning ham safi ortmoqda. O‘ylaymizki, ushbu maqola jurnalistika yo‘nalishida ta’lim olishni maqsad qilganlar uchun foydali bo‘ladi.

Xabaringiz bor, Oʻzbekiston Respublikasi Prezidentining 2018-yil, 24-mayidagi qarorga ko‘ra Oʻzbekiston jurnalistika va ommaviy kommunikatsiyalar universiteti ochildi. 2018-2019-o‘quv yilidan qabul boshlandi. Shu vaqtga qadar yurtimizda jurnalist kadrlarni tayyorlab kelgan O‘zDJTU va O‘zMUda jurnalistika bo‘yicha qabul to‘xtatilgandi.

O‘zJOKUda bakalavr bosqichi boʻyicha Xalqaro jurnalistika, Internet jurnalistika, Teleradiojurnalistika, Bosma va ommaviy axborot vositalari jurnalistikasi, Sport jurnalistikasi, Harbiy jurnalistika yoʻnalishlari mavjud. Universitet hozirda yoʻnalishlar boʻyicha faqatgina jurnalistlarni tayyorlab qolmay, mediadizayner, mediamarketolog, PR menejerlar hamda axborot xizmatlari uchun ham kadrlar tayyorlamoqda. OʻzJOKUda 3 ta fakultet va 5 ta kafedra mavjud boʻlib, bakalavr, magistratura va sirtqi boʻlimlarda 10 dan ortiq yoʻnalish va mutaxassisliklar boʻyicha taʼlim beriladi.

Bugungi kunda O‘zbekiston jurnalistika va ommaviy kommunikatsiyalar universiteti jurnalistika ta’limi bo‘yicha respublikadagi asosiy oliy ta’lim muassasasi hisoblanadi. Shu bilan birga yurtimizdagi bir necha OTMlarda yo‘nalishlar mavjud. Quyida yo‘nalishlar va 2021-2022-o‘quv yilida ajratilgan qabul kvotalari bilan tanishasiz.